同事Y
話說我有一女同事Y，樣貌娟好性格豪邁，食量比一般女子大，久不久我們會相約幾個同事去Jollibee食最毒嘅：炸雞。呢班小姐，食野唔多計較雞皮肥唔肥，熱氣唔熱氣，因為佢地認為食係發洩，特別係果日俾客鬧完之後。據Y講，佢一個人可以食一桶（我最多可以食兩件，即一份combo)食時樣子甚為滋味。上次我同佢地去幫襯Jollibee係二月十一日（週五），點解記得咁清楚因為係過年前就已經約好。
我地多數會去World Wide House傍邊那一家，佢有地面一層同basement，食店在中環來講真係算大，繁忙時間好多家傭響處開飯，又或者接完老細仔女放學就在果度開餐，有時一位難求。呢間係人都知嘅菲律賓名牌店，裡面員工包括收銀及清潔都係揾同鄉做，呢間店好有Cebu feel，感覺好似去左菲律賓。我地幾個人也不是經常一齊食飯，也不是同一部門同一工種；只不過我與佢地老細有工作上嘅聯繫，有時佢地有午間大食會或生日會都會請我過去食野。就在我同我腦細關係咁差大家黑面黑面（我開始懷念我舊老闆）；除左與工作有關，有必要果陣先講野（仲係一句起兩句止）的情況下，我與這些不同部門冇乜利益衝突嘅同事反而有兩句可以傾下，感覺溫暖。
我同Y原本毫無關聯就係咁嘅背景下有偈傾，但從來唔係講買衫買化妝品。從午間吹水時得到嘅信息，Y好飲得酒，佢話小學五六年級嘅時候佢老豆就俾烈酒佢試，話怕佢女仔人家唔識飲酒好蝕底，佢經常概嘆食炸雞有乜理由唔飲啤酒。除左呢樣，就係佢有時會爆粗，講粗口好平常因為有啲情況真係唔講唔得，我也不會視『講粗口』係乜野一回事；只不過我地office會爆粗嘅人非常少，私下有冇講唔知但辦公室就冇聽過，只要有一個人講，那怕係一句『丟那星』都會好令人注目。由於Y比較豪邁，佢同附近嘅同事講：『我係粗人黎嘅，有時講野會大聲甚至會爆粗，你地唔好介意』；佢都係咁同佢老細講；佢老細有時就係憑佢爆邊一句粗而決定事情嘅嚴重性，知道嚴重會衝出黎問佢：『咩事吖，個客做乜野？』當然佢唔會對住個客爆，係收線之後情緒發洩。
據Y講，佢一家都操流利粗口，佢阿媽阿爸都係一輪嘴咁，佢係自小培訓，但係重要場合佢會將某啲句語吞左佢，講呢個話題時另一個斯文同事插嘴：『我阿嫲都講架！』，Y提過丟那星唔係粗口，但diu那星就係，想像一下一個樣貌娟好，斯斯文文笑笑口咁爆粗又有另一種味道；如果有機會我一定會貼佢張相俾你睇。
【拍手可以多至50】
